ဧပြီ ၁၁။

ချင်းပြည်နယ်၊ ဖလမ်းမြို့နယ်၊ ဝေဘူလမြို့ပေါ်သို့ စစ်ကောင်စီက ယမန်နေ့ ဧပြီလ ၁၀ ရက် နေ့လယ် ၁၁ နာရီ အချိန်တွင် လေကြောင်းမှတိုက်ခိုက်ခဲ့ရာ ခရစ်ယာန် သင်းအုပ်ဆရာတော်တစ်ပါး၊ ဖလမ်းမြို့နယ် ကြားကာလ ပညာရေး ဘုတ်အဖွဲ့လက်အောက်ရှိ ပြည်သူ့ကျောင်းမှ ကျောင်းအုပ်ဆရာကြီးတစ်ဦးတို့ အပါအဝင် အရပ်သား ပြည်သူ ၉ ဦး (ကျား- ၆၊ မ- ၃) ထိမှန်သေဆုံးခဲ့သည်ဟု ကြားကာလ ချင်းအမျိုးသားအတိုင်ပင်ခံ ကောင်စီထံမှသိရသည်။

 

ထို့အပြင် အနည်းဆုံး (၄) ဦး ပြင်းထန်စွာ ထိခိုက်ဒါဏ်ရာရရှိခဲ့ကြောင်းလည်း သိရသည်။

 

ယင်းနေ့ ညနေ ၄ နာရီခန့်တွင် ဖလမ်းမြို့နယ်၊ ရမ်ထလိုကျေးရွာကို စစ်ကောင်စီက လေကြောင်းဖြင့် ထပ်မံ ဗုံးကြဲတိုက်ခိုက်မှုပြုလုပ်ခဲ့သော်လည်း လူထိခိုက် သေဆုံးမှု မရှိခဲ့ဟု ကြားကာလချင်းအမျိုးသား အတိုင်ပင်ခံ ကောင်စီထံမှ သိရသည်။

 

စစ်ကောင်စီတပ်သည် ယခုလ ၆ ရက်တွင်လည်း ဖလမ်းမြို့နယ်၊ ရမ်ထလို ကျေးရွာကို မီးရှို့ဖျက်ဆီးခဲ့ရာ နေအိမ် (၁၇) လုံးမီးလောင်ကျွမ်းပျက်စီးခဲ့သည်ဟုဆိုသည်။

 

ဓာတ်ပုံ - လူမှုကွန်ယက်

Burma Associated Press